Mite dhe fakte për presionin e gjakut dhe ritmin e zemrës

Shpesh herë dëgjojmë të thuhet se, nivelet e presionit të gjakut lidhen drejtpërsëdrejti me frekuencën e zemrës.

E vërteta është se, kur matim presionin e gjakut, aparati evidenton fuqinë, me të cilën zemra e shtyn gjakun drejt arterive tona, ndërkohë që ritmi i zemrës, i quajtur edhe puls, evidenton numrin e tkurrjeve të zemrës për një minutë.

Sot ne thyejmë disa mite rreth lidhjes midis presionit të gjakut dhe pulsit:

1. Ato gjithmonë janë të ndërlidhura

Është ky një mit sa i gabuar, aq edhe i shpeshtë. Është e vërtetë se presioni i gjakut dhe ritmi i zemrës shpesh herë ndryshojnë njëkohësisht. Kur trupi ynë është nën stres, ndonjëherë vlerat e tyre rriten njëkohësisht. Megjithatë, nëse ritmi i zemrës ju shpeshtohet, kjo nuk do të thotë se edhe presioni i gjakut ju rritet dhe anasjelltas. Prandaj, është me rëndësi rezultatet e dy matjeve t’i trajtoni veç e veç, sepse njëra tregon një problem, tjetra – një tjetër problem.

2. Që të dy kanë vlera normale

Nuk ka një gjë të tillë si vlerë “normale” e presionit të gjakut apo ritmit të zemrës. Për të dyja këto ka kufij referentë të cilat përcaktojnë nëse gjendja e njeriut është në normë. Sidoqoftë, gjithçka është individuale. Për presion optimal të gjakut shpesh herë pranohet kufiri i lartë deri 120 (presioni kur zemra jonë tkurret) dhe kufiri i ulët 80 (presioni kur zemra qetësohet) mmHg (milimetrat e shtyllës së Merkurit). Ndërsa ritmi i zemrës, në gjendje të qetë të trupit, ka frekuencë 60 deri në 100 rrahje në minutë.

3. Ju keni presion të ulët gjaku ose puls të ngadaltë? Ka të ngjarë të keni problem

Sikundër e thamë më lartë, ajo që për një njeri është normale, për një tjetër mund të jetë tregues për një problem. Një i ri e ka pulsin rreth 50 rrahje në minutë (apo edhe 40) dhe mund të thuhet se në fakt është në formë të mirë fizike. Presioni i ulët i gjakut tek të rriturit ose tek ata që kanë probleme të konstatuara të zemrës mund të jetë lajthitës. Me rëndësi është gjendja e përgjithshme e personit dhe simptomat eventuale, të cilat të kombinuara me rezultatet mund të tregojnë nëse ka një problem. Gjithmonë kur ka dyshime, konsultimi me mjekun është i domosdoshëm. 

4. Presioni i lartë i gjakut është më i rrezikshëm se rrahjet e shpeshta të zemrës

Kjo në fakt është e vërtetë. Studimet tregojnë se kur presioni i gjakut është pak më i lartë se normalja për një kohë të gjatë, atëherë po rritet risku i problemeve me zemrën. Rrahjet e shpeshta të zemrës gjithashtu mund të jenë problem, por lidhja e shkakut me pasojën nuk është aq e qartë.

5. Ka rëndësi kur e matni presionin dhe pulsin

Kjo është e vërtetë për të dy llojet e matjeve. Në radhë të parë, duhet të jeni i qetë. Nëse matni presionin dhe pulsin disa herë në ditë, duhet të mbani parasysh mesataren, në mënyrë që të krijoni një ide të qartë për gjendjen e vet.